1 Bami 5

Solomoni mbwaakalibambila kuyaka Ŋanda ya Leza

¹ Mwami Hilamu waku Taya wakali mulongwe wa Devedi ciindi coonse, nkabela naakamvwa kuti Solomoni mwanaa Devedi nguwakananikwa mubusena bwawisi, wakatuma bantu kulinguwe. ² Aawo awalo Solomoni wakatuma makani kuli Hilamu aakuti, ³ “Ulizi kuti taata Devedi taakakonzya kuyaka ŋanda ya Leza akaambo kabasinkondonyina bakali kumulwana kuzwa kumabbazu oonse. Pele Mwami Leza wakamuzundya. ⁴ Lino mebo Mwami Leza wangu wandipa luumuno mumabbazu aacisi cangu coonse. Ciindi cino nsijisi basinkondoma naaba mapenzi. ⁵ Nkaako ndiyanda kuyakila Mwami Leza wakasyomezya taata Devedi kuti, ‘Mwanaako, ooyo ngwenjoobikka acuuno cako nguyoondiyakila ŋanda.’ Lino mukuti ndiyake ŋanda eeyi ⁶ ndilomba kuti utume bantu bako ku Lebanoni kuti bakanditemene milombe. Ambebo lwangu ndilatuma bantu bangu kuti bazoobelekele antoomwe abako, nkabela njookubbadela kufumbwa ncotikaambe. Mbuli mbozi kale kuti taakwe naba omwe wabantu bangu uuzi mbokutemwa kabotu milombe mbuli baku Sidoni.”

⁷ Hilamu wakabotelwa kapati kumvwa makani aaya aakazwa kuli Solomoni, wakaamba kuti, “Alumbaizigwe Mwami Leza sunu akaambo kakuti wakapa Devedi mwana musongo kuba ngomwami wabantu bakwe!” ⁸ Hilamu wakatumina makani aaya kuli Solomoni wakati, “Makani aako ndakaatambula, alimwi ndililibambilide kucita ncokumbila, ndiyookupa milombe amipulanga. ⁹ Bantu bangu bayooabweza kuzwa kucilundu ca Lebanoni kwaaleta kulwizi, akwaaanga aamwi muzileye kabaza angawo mumaanzi kusikila kubusena mboyoosala. Ooko bantu bangu bayooaangununa akwaapa kubantu bako kuti baabambe. Ono ncoelede buyo kucitila bantu bangu yebo nkuti kobapa cakulya.”

¹⁰ Aboobo Hilamu wakapa Solomoni milombe amipulanga njaakali kuyanda. ¹¹ Awalo Solomoni wakapa Hilamu zisuwo zyamaila zili zyuulu zili mwaanda, alimwi amafuta aaoliva aazula matalo aali myaanda yobilo. Solomoni wakali kucita mbubonya oobo mwaka amwaka.

¹² Mwami Leza wakabamba cisyomezyo cakwe, wakapa Solomoni busongo. Kwakali luumuno akati ka Hilamu a Solomoni, nkabela bakapangana cizuminano cabulongwe akati kabo.

¹³ Lino mwami Solomoni wakalemba basicibbalo bali zyuulu zili makumi otatwe. ¹⁴ Wakali kutuma bantu ku Lebanoni bali zyuulu zili kkumi mwezi amwezi, munzila eeyi bakali kukonzya kukkala myezi yobilo kumunzi, ku Lebanoni bakali kukkala mwezi omwe. Eelyo wakabikka Adinolamu kuti abe nguubalanga. ¹⁵ Solomoni wakabaandaanya muzipaanzi zyotatwe, basimusempula bakali zyuulu zili ciloba, basikubeza mabwe muzilundu bakali zyuulu zili lusele. ¹⁶ Wakabikka baalumi bali zyuulu zyotatwe amyaanda yotatwe basikubelesya bantu milimo. ¹⁷ Mwami Solomoni wakalailila kuti bazyule mabwe mapati mabotu akwaabeza abe aantalisyo yaŋanda ya Leza. ¹⁸ Nkabela basimilimo ba Solomoni aba Hilamu, alimwi abantu bazwa kumunzi wa Gebali mbabakabeza mabwe amapulanga aakuyaka ŋanda ya Leza.