1 Bami 4
Balupati-pati bamwami Solomoni
1 Mwami Solomoni wakali mwami wa Isilayeli yoonse. 2 Lino mbaaba balupati-pati bakwe. Mupaizi wakali Azaliya mwanaa Zadoki.
3 Balembi mbaaba: Eliholefu a Ahija, bana ba Syisya, mulembi wamakani wakali Jehosyafati, mwana wa Ahiludi.
4 Silutwe walumamba wakali Benaiya, mwanaa Jehoiyada. Bapaizi mbaaba: Zadoki a Abiyata, 5 mupati wabeendelezi bazisi ngu Azaliya, mwanaa Natani. Mulailili wamwami wakali Zabudi mupaizi, mwanaa Natani. 6 Mupati wabasyaaŋandu wakali Ahisya. Mweendelezi wabasicibbalo wakali Adonilamu, mwana wa Abuda. 7 Alimwi Solomoni wakasala abambi baalumi bali kkumi kuba beendelezi bazisi mu Isilayeli. Bakali basikupa zilyo zya mwami abaŋanda yakwe. Umwi aumwi wabo wakali kuleta kwamwezi oonse. 8 Ngaaya mazina aabeendelezi aabo, amazina aazisi nzibakali kweendelezya. Beniha, wakali kweendelezya cisi catulundu-lundu ca Efulemu. 9 Bendeka wakali kweendelezya minzi ya Makazi, Syaalibimu, Betisyemesyi, Eloni, Betihanani. 10 Benihesedi, wakali kweendelezya minzi ya Aluboti, Soko, alimwi acisi coonse ca Hefa. 11 Benabinadabu, ooyo wakakwete Tafali mwanaa mwami Solomoni, wakali kweendelezya cisi catulundu-lundu ca Doli. 12 Baana, mwana wa Ahiludi, wakali kweendelezya minzi ya Taanaki, Megido, alimwi acisi coonse cakali aafwiifwi a Betisyani, kumbali aamunzi wa Zaletani, kumusanza wamunzi wa Jezuliili, mane akuyoosika kumunzi wa Abelimehola awa Jokimeyanu. 13 Bengeba wakali kweendelezya minzi ya Lamoti, Giliyadi, atunzi tumwi twa Jaili mwana wa Manase, alimwi acisi ca Aagobu cili mu Basyani. Antoomwe yakali minzi mipati iili makumi aali cisambomwe, yakakwabililidwe alimwi yakajisi amilyango iipingwa azibulo zyamukuba. 14 Ahinadabu mwana wa Ido wakali kweendelezya munzi wa Mahanaimu. 15 Ahimaanzi ooyo wakakwete Basemati, mwanaa mwami Solomoni wakali kweendelezya munzi wa Nafutali. 16 Baana mwanaa Husyayi wakali kweendelezya cisi ca Asye a Aloti. 17 Jehosyafati mwanaa Paluwa wakali kweendelezya cisi ca Isakaa. 18 Syimeyi mwana wa Ela wakali kweendelezya cisi ca Benjamini. 19 Gebe mwana wa Uli wakali kweendelezya cisi ca Giliyadi cakali kulelwa a Sihoni mwami wa Baamoli a Ogi mwami wa Basyani. Alimwi kunze aabeendelezi aaba bakali kkumi ababili, kwakali aumbi muleli umwi wakali kulela cisi ca Juda.
Solomoni mbwaakalela kabotu
20 Lino bantu ba Juda a Isilayeli bakavula kapati mbuli musenga wankomwe yalwizi. Bakali kulya akunywa alimwi akubotelwa kapati. 21 Solomoni wakali kulela zisi zyoonse kuzwida kumulonga wa Yufuletisi kulubazu lwakumbo, kuyoosikila kunyika ya Bafilisiti mane kumunyinza wa Ijipiti. Boonse bantu aaba bakali kutela kulinguwe alimwi bakali bantu bakwe mubuumi bwakwe boonse.
22 Lino mweelwe wazilyo nzyaakali kubelesya Solomoni buzuba abuzuba zyakali zisuwo zyabusu bunante zili mwaanda amakumi osanwe. Alimwi azisuwo zili myaanda yotatwe zyamaila, 23 aŋombe zili kkumi zisanininwa mucimpati, azimwi zili makumi obilo zilicelela, mbelele zili mwaanda, mpongo kubikkilizya abakonze, banakasya, balubondwe, abayuni baneneede.
24 Solomoni wakali kulela nyika yoonse iili kumbo lyamulonga wa Yufuletisi, kuzwida ku Tifusa kusikila ku Gaza. Bami boonse bakumbo lya Yufuletisi bakali bakwe, aboobo wakakkede muluumuno amasi ngaakabambene aawo. 25 Ciindi coonse ncaakali kupona, bantu bamucisi coonse ca Juda aca Isilayeli kuzwida ku Dani kuyoosika ku Biiyasyeba bakakkede kabotu akuliiba. Bamukwasyi omwe-omwe bakalijisi muunda wansaansa amikuyu.
26 Mwami Solomoni wakalijisi mabbiza ankalaki zili zyuulu zili makumi one abasikutanta bali zyuulu zili kkumi azibili. 27 Beendelezi bakwe bakali kkumi ababili, omwe-omwe wabo wakali kupa zilyo nzyaakali kuyanda mwami Solomoni abaabo mbaakali kulya aabo mwezi amwezi, nkabela lyoonse bakali kubona kuti kunyina cakabulide. 28 Alimwi mweendelezi omwe-omwe wakali kupa caabilo cakwe ncakaambilidwe cazilyo zyakulya zyamaila abwizu bwakulya mabbiza aakwela nkalaki amabbiza amwi.
29 Leza wakapa Solomoni busongo, luzibo amaanu manji kapati. 30 Solomoni wakali musongo kwiinda basongo bakujwe, alimwi wakali kwiinda abasongo baku Ijipiti. 31 Wakali musongo kwiinda bantu boonse kubikkilizya a Etani Muezuli akwiinda basongo ba Hemani, Kalikoli, a Daada bana ba Maholi. Mpuwo yakwe yakamwaika moonse muzisi zyakazingulukide. 32 Wakaanza tusimpi tuli zyuulu zyotatwe akupanga nyimbo zili cuulu azisanu. 33 Wakaiisya zyamisamu atusyango kutalikila kumulombe waku Lebanoni akuyoosikila kukateyo kahisopo kamena abwaanda. Alimwi wakaiisya zyabanyama, bayuni azikalaba alimwi answi. 34 Bantu bamisyobo imwi bakaboola kuzoomvwa zyabusongo bwakwe kabatumwa abamami boonse bamunyika, bakamvwide zyabusongo bwakwe.