1 Bami 20
Nkondo acisi ca Siliya
1 Lino mwami Benihadadi wacisi ca Siliya wakabunganya basinkondo bakwe boonse. Wakasindikilwa abambi bami bali makumi otatwe ababili, kabajisi basimabbiza ankalaki zyabo. Wakainka waakusinkilizya munzi wa Samaliya woonse abasilumamba bakwe, amane wakatalika kuulwana. 2 Wakatuma batumwa kuya mumunzi kuti bakaambile mwami Ahabu wa Isilayeli kuti, “Mwami Benihadadi mboobu mbwaamba wati, 3 ‘Ngolida ansiliva nzyojisi nzizyangu bana abamakaintu babotu mbibangu.’”
4 Mwami Ahabu wakaingula kuti, “Amukamwaambile simalelaangu Benihadadi kuti, ‘Mebo azeezyo nzejisi nzizyakwe.’” 5 Musule akooko, batumwa aaba bakaboola alwabili kuli Ahabu kabajisi amakani aambi kuzwa kuli Benihadadi aamba kuti, “Ndakwaambilide kuti undipe nsiliva angolida, bamakaintu a bana banu. 6 Pele lino juunza cino ciindi ndizootuma balupati-pati bangu kuti bazoolange-lange zyamuŋanda yako azyamumaanda aabalupati-pati bako kuti zyoonse zyoyandisya bazoozitole”
7 Mwami Ahabu wakaita bapati bacisi cakwe coonse akubaambila kuti, “Mwabona muntu ooyu kuli ncayanda. Kusaanguna wakatumya kuti uyanda bamakaintu bana nsiliva angolida zyangu, mebo ndakamuzuminina.”
8 Bapati abantu bakalailila Ahabu kuti, “Utamuswiilili akumucitila ncayanda pe.”
9 Lino Ahabu wakaambila batumwa ba Benihadadi kuti, “Amukamwaambile simalelaangu mwami kuti ndakazumina kuli ncaakandaambila kucita akusaanguna, pele nsikonzyi kuzumina kuli ceeci cabili ncayanda pe.”
10 Batumwa aabo bakainka kuyooambila Benihadadi, Benihadadi wakatumya aambi makani aakuti, “Baleza bandisubule akwiindilila kuti naa nditabooli abantu banji kuzoolwana munzi wako ooyo kuti uzoobe vu lyalo-lyalo.”
11 Pele mwami Ahabu wakaingula kuti, “Amukamwaambile mwami Benihadadi kuti sinkondo mwini-mwini tataliki kulidunda nkondo kiitana mana, ulidundaizya yamana.”
12 Benihadadi wakaakumvwa kwiingula kwa Ahabu ooku ciindi walo abaabo bami bamwi nibakali kunywa. Eelyo wakaambila basilumamba bakwe kuti balibambile kuyoolwana munzi ooyo, balo bakacita mbubonya mbubakalaililwa.
13 Zintu eezi kazicitika, musinsimi wa Leza umwi wakainka kuli Ahabu mwami wa Isilayeli kuyooambilizya kuti, “Mwami Leza wati, ‘Utayoowi mpi eeyi, sunu mabala ndilaboola kulinduwe, ndendilyo notizibe kuti mebo ndendime Mwami Leza.’”
14 Nkabela Ahabu wakabuzya kuti, “Ino nguni uutitalike lumamba?”
Musinsimi ooyo wakaingula kuti, “Basilumamba bakubusi kabalaililwa abeendelezi. Mbabaticite oobo.” Mwami Ahabu wakabuzya alimwi kuti, “Ino nguni uutitalike nkondo eeyi?” Mpawo musinsimi wakaingula kuti, “Nduwe.”
15 Mpoonya mwami wakaita bakubusi aabo balaililwa abeendelezi, bakali myaanda yobilo amakumi otatwe ababili. Musule lyabo wakaita basinkondo Baisilayeli basika kuzyuulu zili ciloba antoomwe. 16 Bakatalika kulwana acilundu-lundu ciindi Benihadadi abami bali makumi otatwe mbaakali aabo nibakali kunywa kabakoledwe. 17 Bakubusi Babaisilayeli mbibakasaanguna kulwana. Benihadadi wakatumide basikulanga-langa balo bakazooti kulinguwe kuli bantu baza buza kuzwa ku Samaliya. 18 Benihadadi wakabalailila kuti, “Kuti naabaza caluumuno mubajate naa bazida kulwana mubajate.”
19 Lino bakubusi aabo bakali kulaililwa abeendelezi bakali kumbele kabaccililwa abasilumamba Baisilayeli. 20 Nkabela umwi aumwi wabo wakajaya sinkondonyina. Nibakabona oobo Basiliya bakatija, Baisilayeli bakabatandaanya, Benihadadi wakatanta abbiza lyakwe watija abasimabbiza bakwe bamwi. 21 Mwami Ahabu wa Baisilayeli wakabalwana canguzu wanyonyoona mabbiza ankalaki zyabo akubajaya bunji bwabo.
22 Mpoonya ooyo musinsimi wakainkila mwami Ahabu akuyooti kulinguwe, “Koya ono ukabikkile abamwi basinkondo, nkaambo mwakali mwami waku Alamu uzooboola alimwi kulwana.”
Baalamu mbubakalwana lwabili
23 Lino balupati-pati bamwami Benihadadi bakasika akumulailila kuti, “Baleza ba Baisilayeli mbaaleza bazilundu, ncibakatuzundila mwakali. Pele kuti twabalwanina mumabanda inga twabazunda.” 24 Lino nceeci ncoelede kucita, gwisya bamami mubweendelezi bwankondo ubikke bambi. 25 Wamana uyungizye basinkondo kuti mweelwe weelane awababaya bakafwa, alimwi amabbiza ankalaki mbubonya, ndendilyo notukonzya kulwana Baisilayeli mumabanda. Masimpe tuyoobazunda.
Mwami Benihadadi wakazumina akucita mbubakalailila. 26 Nicakasika ciindi eeco Benihadadi wakaita basilumamba bakwe azilwanyo zyabo baya kumunzi wa Afeki kuti bakalwane Baisilayeli. 27 Ciindi Baisilayeli nibakalibunga-bunga azilwanyo zyabo bakainka kukulwana. Baisilayeli bakayaka zivuka kulangana ambabo mbuli tutanga twampongo tobilo, kakuli Baalamu bakalizwide busena boonse.
28 Musinsimi wa Leza wakainka ku mwami Ahabu akuyoomwaambila kuti, “Mboobu mbwaamba Mwami Leza, Baalamu bayeeya kuti mebo nde Mwami Leza ndileza wazilundu kutali wamabanda, ndabaaba kulinduwe, ndendilyo notizibe kuti mebo ndendime Mwami Leza.”
29 Kwamazuba aali ciloba Baalamu a Baisilayeli bakaliyakide zivuka kabalangene. Pele mubuzuba bwaciloba bakatalika kulwana, nkabela Baisilayeli bakajaya Baalamu basikweenda aamaulu bali zyuulu zili mwaanda buzuba bomwe. 30 Aabo bakacili baumi bakatijila mumunzi wa Afeki mwalo oomo bwaanda bwamunzi mubwakalimba bali zyuulu zili makumi obilo aciloba.
Banihadadi wakatijila mumunzi oomo, wayuba muŋanda yamukati. 31 Balupati-pati bakamuunkila akuyooti kuli nguwe, “Twakamvwa kuti bami ba Baisilayeli mbaasiluzyalo. Kotuzumizya tuunke kumwami wa Baisilayeli katusamide masaka muzibuno akulizambaila ngozi munsingo, ambweni inga takookujaya.” 32 Aboobo bakasama masaka muzibuno akulizambaila ngozi musingo. Bakainka kuli Ahabu akuyooti kulinguwe, “Mubelesi wako Benihadadi ulakombelezya kuti utamujayi pe.” Mpoonya Ahabu wakaingula kuti, “Sena muumi? Ncibotu! Kayi mukwesu!”
33 Lino baalumi aabo nibakamvwa boobo bakayeeya kuti ncintu cibotu. Mpoonya bakati, “Iiyi muumi munyoko.”
Mpawo Ahabu wakabalailila kuti, “Amukamulete kuli ndime.” Naakasika Benihadadi, Ahabu wakamwiita kuti akale anguwe munkalaki. 34 Eelyo Benihadadi wakati kulinguwe, “Ndiyookubweedezezya minzi eeyo taata njaakanyangide uso, alimwi ulakonzya kucita munzi wa Damasikasi kuba munzi wako wakusambalila mbubonya mbuli taata mbwakacitide mu Samaliya.”
Ahabu wakaamba kuti, “Kwiindila mucizuminano ncoocita eeci ndilakuleka. Mbombuboobu mbwaakapangana cizuminano anguwe, akumuleka.”
Musinsimi mbwakalailila Ahabu
35 Kwiindila mukulaililwa a Mwami Leza, umwi wabasinsimi wakaambila mweenzinyina kuti, “Nduume!” Pele walo wakakaka. 36 Aboobo wakati kulinguwe, “Akaambo kakuti wakaka kuswiilila Mwami Leza mbotizwide buyo aano syuumbwa ulakujaya.” Nkabela mbwaakazwida buyo syuumbwa wakasika wamuluma akumujaya.
37 Lino musinsimi ooyo wakaakujana umbi amane wakati kulinguwe, “Nduume!” Ooyu wakamuuma akumucisa. 38 Musinsimi ooyo wakazambaila busyu bwakwe cisani kutegwa atazibwi, eelyo wakainka akuyooima kumbali aamugwagwa, ulindila mwami wa Baisilayeli. 39 Naakainda mwami, musinsimi wakamwiita akuti kulinguwe, “Oolemekwa, ndali kulwana nkondo mpoibbebba, nkabela sinkondo umwi wandiletela mwaange akundaambila kuti, ‘Komulanga muntu ooyu, kuti naa atije ulafwa nduwe nikuba kubbadela talenta ya nsiliva.’ 40 Pele mebo nkecizingauka muntu ooyu watija.”
Mpawo mwami wakaingula kuti, “Usubuke, ncisubulo cako omwini.”
41 Lino musinsimi wakalivumbula cisani ncaakalivumbilide kumeso. Mpoonya aawo mwami wakamuziba kuti ngumwi wabasinsimi. 42 Musinsimi ooyo wakati kumwami, “Mboobu mbwaamba Mwami Leza ulati, ‘Akaambo kakuti waleka muntu ooyo ngundaabide kulinduwe kuti afwe ono kulafwa nduwe, mubusena bwakwe, mubusena bwabantu bakwe, kulafwa bantu bako.’”
43 Mpawo mwami wakabweeda ku Samaliya, kazingidwe kapati akufuta.