1 Bami 16

¹ Lino Mwami Leza wakakanana kumusinsimi Jehu mwanaa Hanani kuti akaambile Baasya ² kuti, “Wakali muntu buyo pele mebo ndakucita kuti ube musololi wabantu bangu Baisilayeli, umane ayebo wakandibisizya mbuli Jelobowamu, wasolweda bantu bangu mucibi, calo cakandinyemya kapati. ³ Aboobo ndilakugwisya yebo amukwasyi wako mbuli mbundakacita Jelobowamu mwanaa Nebati. ⁴ Kufumbwa wamukwasyi wako uuyofwida mumunzi uyooligwa babwa, alimwi kufumbwa uyoofwida musokwe uyooligwa bayuni.”

⁵ Lino eezyo zyoonse nzyaakacita Baasya, amilimo yakwe yoonse, ililembwedwe mubbuku lya makani aabami Baisilayeli. ⁶ Baasya wakafwa akuzikkwa abasikale bakwe mu Tiiza, nkabela mwanaakwe Ela nguwakaba mwami mubusena bwakwe.

⁷ Baasya katanafwa Mwami Leza wakakanana kwiindila mumusinsimi Jehu, mwanaa Hanani kwaamba zyacisubulo eeco ciyooba kumukwasyi oonse wa Baasya akaambo kazibi nzyaakacita ku Mwami Leza, nkaambo kazeezi Mwami Leza wakanyema mbwaakanyemena mukwasyi wa Jelobowamu ngwaakanyonyoona.

Zyamwami Ela wacisi ca Isilayeli

⁸ Mumwaka wamakumi obilo acisambomwe wakulela kwamwami Asa wacisi ca Juda, Ela mwanaa Baasya wakaba mwami wacisi ca Isilayeli, wakalela mu Tiiza kwamyaka yobilo. ⁹ Lino umwi wabalupati-pati bakwe uutegwa Zimuli, ooyo wakali mupati wacisela cabasikweenzya nkalaki, wakamuzangila. Ciindi eeco Ela wakali ku Tiiza muŋanda ya Aza mulangi wabasyaaŋandu kanywa mane wakolwa. ¹⁰ Zimuli wakasika a kumujaya, ooyu wakali mwaka wamakumi obilo aciloba wakulela kwa Asa mucisi ca Juda. Kumane Ela wakaba ngomwami.

¹¹ Lino Zimuli mbwaakalelela buyo wakajaya bamukwasyi wa Baasya boonse. Taakwe naba omwe mulombe ngwaakasiya muli baluzubo naa beenzinyina Baasya. ¹² Zimuli wakanyonyoona boonse bamukwasyi kweendelana abwakaambide Mwami Leza kwiindila mumusinsimi Jehu. ¹³ Eeci cakaba boobo nkaambo ka Baasya amwanaakwe Ela bakabisizya Mwami Leza wa Isilayeli akusolweda bantu mucibi mukutobela milimo iitagwasyi. ¹⁴ Lino eezyo zyoonse nzyaakacita Ela zililembedwe mubbuku lyamakani aabami ba Isilayeli.

Zyamwami Zimuli wacisi ca Isilayeli

¹⁵ Mumwaka wamakumi obilo aciloba wakulela kwa Asa wacisi ca Juda, Zimuli wakalela Baisilayeli mumunzi wa Tiiza kwamazuba aali ciloba. Ciindi eeco basilumamba ba Baisilayeli bakayakide zivuka munsi aamunzi wa Bafilisiti uutegwa Gebetoni. ¹⁶ Nibakamvwa kuti Zimuli wakajaya mwami, bakasala silutwe wabo Omuli kuti abe mwami wa Isilayeli mubuzuba oobo. ¹⁷ Lino Omuli abasilumamba bakwe bakazwa mu Gebetoni baakusinkilizya munzi wa Tiiza. ¹⁸ Zimuli naakabona kuti munzi buutola, wakatijila mukaanda kamujulu kaŋanda yabwami walitentela muli nkako. ¹⁹ Eeci cakaba boobo akaambo kacibi ncaakabisizya Mwami Leza. Awalo wakali mbuli bwakabede Jelobowamu, akusolweda Baisilayeli mucibi. ²⁰ Lino eezyo zyoonse Zimuli nzyaakacita azyabuzangi bwakwe, zililembedwe mubbuku lyamakani aabami ba Isilayeli.

Zyamwami Omuli wacisi ca Isilayeli

²¹ Bantu ba Isilayeli bakaandaana. Cisela cabo cakali kuyanda Tibini mwanaa Ginati kuti abe ngomwami, cisela cimwi cakali kuyanda Omuli. ²² Kumamanino aabo bakali kuyanda Omuli bakazunda, Tibini wakafwa, eelyo Omuli wakaba ngomwami. ²³ Mumwaka wamakumi otatwe aumwi wakulela kwa Asa wacisi ca Juda, Omuli wakaba ngomwami wacisi ca Isilayeli, nkabela wakalela kwamyaka iili kkumi aibili. Kwamyaka iili cisambomwe yakusaanguna wakali kulela mu Tiiza. ²⁴ Mpoonya wakaula cilundu ca Samaliya kuzwa kuli Syema amatalenta aansiliva obilo. Omuli wakayaka munzi acilundu ngwakaita kuti Samaliya kuzwa kuzina lya Syema wakali mukamwini cilundu eeco. ²⁵ Pele Omuli wakabisizya Mwami Leza kwiinda boonse bakamusaangunina kulela. ²⁶ Awalo wakanyemya Mwami Leza wa Isilayeli mbuli bwakacita Jelobowamu, wakasolweda Baisilayeli mucibi mukutobela mituni iitagwasyi. ²⁷ Lino eezyo zyoonse Omuli nzyaakacita azimwi amilimo yakwe yoonse, zililembedwe mubbuku lyamakani aabami ba Isilayeli. ²⁸ Omuli wakafwa akuzikkwa abasikale bakwe mu Samaliya. Nkabela Ahabu mwanaakwe ngukaba mwami mubusena bwakwe.

Zyamwami Ahabu wacisi ca Isilayeli

²⁹ Mumwaka wamakumi otatwe alusele wakulela kwa Asa mwami wacisi ca Juda, Ahabu mwana wa Omuli wakaba ngomwami wa Isilayeli. Wakalela mu Samaliya kwamyaka iili makumi obilo aibili. ³⁰ Pele awalo wakaindilizya kubisizya Mwami Leza. ³¹ Taakali kucita zinyonyoono buyo mbuli Jelobowamu mwanaa Nebati, pele wakakwata Jezibeli, mwanaa Etibaali mwami waku Sidoni, akutalika kukomba Baali. ³² Wakayaka cikombelo ca Baali acipaililo mumunzi wa Samaliya. ³³ Alimwi wakaimika mituni ya Asyela leza mukaintu. Wakacita ziinda waawa cakuti wakanyemya Mwami Leza wa Isilayeli kwiinda boonse bami ba Isilayeli bakamusaangunina kulela. ³⁴ Ciindi Ahabu naakali kulela muntu umwi uutegwa Hiyeli uuzwa ku Beteli, wakayakulula munzi wa Jeliko. Nkabela mbubonya mbuli Mwami Leza mbwaakaambide kale kwiindila muli Josyuwa mwanaa Nuni, Hiyeli wakafwidwa mwanaakwe wakusaanguna Abilamu ciindi naakasya lwiimbi lwamunzi wa Jeliko, alimwi wakafwidwa mwanaakwe wamamanino, wakali kutegwa Segubu, naakayaka milyango yamunzi.