1 Bami 15

Zyamwami Abija waku Juda

¹ Mumwaka wakkumi alusele wakulela kwa Jelobowamu mwami wa Baisilayeli, Abija wakaba ngomwami wacisi ca Juda, ² wakalela mu Jelusalemu kwamyaka yotatwe. Banyina bakali Maaka mwana wa Abisalomu. ³ Abija awalo wakabisya mbubwakali kucita wisi. Moyo wakwe tiiwakamaninide ku Mwami Leza wakwe mbubuli bwakali wa Devedi sikale wabo. ⁴ Lino akaambo ka Devedi Mwami Leza wakapa Abija mwana mulombe wakuti akalele mu Jelusalemu ciindi aakufwa alimwi akuyooyumya munzi wa Jelusalemu. ⁵ Mwami Leza wakakucita ooku nkaambo ka Devedi wakali kutobela milawo yakwe lyoonse. Ccita buyo mumakani aa Uliya Muhiti. ⁶ Kwakali mazwanga lyoonse akati ka Abija a Jelobowamu mubuumi bwa Abija boonse. ⁷ Lino zintu zyoonse nzyaakacita Abija zililembedwe mubbuku lyamakani aabami ba Juda. ⁸ Nkabela Abija wakafwa akuzikkwa abasikale bakwe mumunzi wa Devedi. Asa nguwakaba mwami mubusena bwakwe.

Zyamwami Asa wa Juda

⁹ Lino mumwaka wamakumi obilo aakulela kwa Jelobowamu mwami wa Isilayeli, Asa wakaba ngomwami wa Juda. ¹⁰ Wakalela kwamyaka iili makumi one aumwi mu Jelusalemu. Banyinakulu Asa bakali Maaka, mwana wa Abisalomu. ¹¹ Asa wakali kucita zibotezya Mwami Leza, mbubwakali kucita Devedi sikale wakwe. ¹² Wakatanda baalumi boonse bakali kucita zitaambiki mumalende kuzwa munyika yakwe. Wakamwaya amituni eeyo yakayakide bamawisi. ¹³ Abalo banyinakulu wakabatanda muciinga cabwami nkaambo bakajisi mutuni wa Asyela. Asa wakuugonka akuyooutentela kukkuti lya Kidiloni. ¹⁴ Nikuba kuti taakamwaya malende pele moyo wakuubikkide ku Mwami Leza mubuumi bwakwe boonse. ¹⁵ Wakaleta kuŋanda ya Mwami Leza nsiliva, ngolida azintu zimwi, walo awisi nzibakapede ku Mwami Leza. ¹⁶ Kwakali mazwanga lyoonse akati ka Asa wacisi ca Juda a Baasya wacisi ca Isilayeli mubwami bwabo boonse. ¹⁷ Baasya wakainka kuyoolwana cisi ca Juda, wakayakilizya munzi wa Lama kuti kubule uunjila nikuba kuzwa mucisi ca Juda. ¹⁸ Pele mwami Asa naakabona boobo wakabweza nsiliva angolida zyoonse eezyo zyakasyeede muŋanda ya Mwami Leza ayakwe mwini, wakazipa balupati-pati bakwe kuti bazitole kumwami Benihadadi waku Alamu, mwanaa Tabulimoni, muzyukulu wa Heziyoni amakani aakuti, ¹⁹ “Atupangane bulongwe bwakugwasyanya, mbuli bwakacitide bamatata. Nsiliva angolida eezi ncipego cako. Ino mbuti kuti bulongwe bwanu a Baasya bwamana, kutegwa agwisye basilumamba bakwe mucisi cangu.” ²⁰ Lino mwami Benihadadi wakuuzumina muzeezo wa Asa ooyu. Mpawo wakatuma bapati babasilumamba bakwe antoomwe abasilumamba babo kuyoolwana minzi ya Isilayeli. Bakaakuzunda minzi ya Ijoni, Dani, Abelabetimaaka, a Kineleti, Kujatikizya acisi ca Nafutali coonse. ²¹ Ciindi mwami Baasya naakamvwa cakacitika, wakaleka kuyakilizya Lama wakainka ku Tiiza. ²² Eelyo Asa wakatumya majwi mucisi ca Juda coonse, akulailila bantu boonse kutaleka naba omwe pe, kuti bakagwasye kuyoobweza mabwe oonse amapulanga kuzwa ku Lama aayo ngaakali kubelesya Baasya mukuyakilizya munzi ooyo. Nkabela Asa wakabelesya zintu eezi mukukwabilila minzi ya Mizipa, a Geba uuli mucisi ca Benjamini.

²³ Zintu zyoonse Asa nzyaakacita, zya nguzu zyoonse azimwi nzyakaacita kubikkilizya a minzi njaakayaka, zililembedwe mubbuku lyamakani aabami ba Juda, Naakacembaala myeendo yakali kucisa. ²⁴ Asa wakafwa akuzikkwa abasikale bakwe mumunzi wa Devedi, eelyo mwanaakwe Jehosyafati nguwakaba mwami mubusena bwakwe.

Zyamwami Nadabu wacisi ca Isilayeli

²⁵ Lino Asa naakali mumwaka wakwe wabili wakulela cisi ca Juda, Nadabu mwanaa Jelobowamu nguwakaba mwami mucisi ca Isilayeli. Wakalela kwamyaka yobilo. ²⁶ Pele awalo wakatobela nzila yawisi, wakabisizya Mwami Leza akusolweda Baisilayeli mucibi. ²⁷ Baasya mwana wa Ahija wamusyobo wa Isakaa wakamuzangila kumane wakamujaya ku Gibetoni munzi Wabafilisiti. Ciindi Nadabu a Baisilayeli boonse nibakali kusinkilizya munzi ooyo. ²⁸ Baasya wakajaya Nadabu mumwaka watatu wabwami bwa Asa waku Juda. Baasya wakaba ngomwami. ²⁹ Lino mbwaakanjilila buyo mubwami wakajaya boonse bamukwasyi wa Jelobowamu, taakwe naba omwe ngwaakasiya kali muumi pe. Eeci cakacitika kweendelana abwakaambide Mwami Leza kwiindila mumubelesi wakwe Ahija ku Syilo. ³⁰ Eeci cakaba boobo akaambo ka Jelobowamu wakabisizya Mwami Leza wa Isilayeli akumunyemya, alimwi akaambo kakusolweda cisi ca Isilayeli mucibi. ³¹ Lino zyoonse zyaakacita Nadabu zililembedwe mubbuku lyamakani aabami ba Isilayeli. ³² Kwakali mazwanga lyoonse akati kabwami bwa Asa a Baasya.

Zyamwami Baasya wacisi ca Isilayeli

³³ Mumwaka watatu wabwami bwa Asa waku Juda, Baasya mwana wa Ahija wakaba ngomwami wacisi ca Isilayeli coonse, ku Tiiza. Wakalela myaka iili makumi obilo aine. ³⁴ Pele awalo wakabisizya Mwami Leza mukutobela nzila zya Jelobowamu wakabisizya Mwami Leza akusolweda Baisilayeli mucibi.