1 Bami 12
Misyobo yakunyika mbuyakazanga
1 Lehobowamu wakainka ku Syekemu ooko Baisilayeli nkobakabungene kuti bamunjizye mubwami. 2 Lino Jelobowamu mwanaa Nebati naakamvwa boobo, ciindi eeci wakacili mu Ijipiti nkwaakatijilide kuzwa kumwami Solomoni, wakaboola kuzwa ku Ijipiti. 3 Baisilayeli mbibakamutumina kuti aboole, nkabela boonse bakainka ku mwami Lehobowamu akuyooti kulinguwe, 4 “Solomoni uso wakali kutulela calunya alimwi wakali kutuminya kapati, yebo tulemunune notutibe bantu bako.”
5 Lehobowamu wakabaingula kuti, “Mukaboole kwainda mazuba otatwe, nenzoomwiingula.” Aboobo bantu bakainka.
6 Mpoonya Lehobowamu wakabuzya-buzya bamanene aabo bakali kulailila Solomoni wisi, wakababuzya kuti, “Ino inga mwandilailila kuti nzoobaambile buti bantu aaba?”
7 Balo bakamwiingula kuti, “Kuti naa koyanda kuba mubelesi mubotu uleelede kuti ukabaingule kabotu akubazumizya ncobakumbila, ndendilyo nibayookubelekela kabotu akukuswiilila lyoonse.”
8 Pele Lehobowamu taakwe naakaaswiilila malailile aabo pe, amane wakaya kuli bamusela wakwe, mbaakakomena limwi, waakubabuzya kuti, 9 “Ino nywebo inga mwandilailila kuti, nkati nzi kubantu aaba bandikumbila kuti ndibaubauzizye mikuli yabo?” 10 Eelyo balo bakati, “Mboobu mbotikabaambile, ‘Imebo katengeza kangu nkapati kwiinda cibuno cataata.’ 11 Nkokuti naa mikuli yataata yakali kumulemena yangu iyoomuminya. Taata wakali kumuumya miluso, pele mebo noomukwabbaula zimboko.”
12 Lino nikwakainda mazuba otatwe, Jelobowamu a Baisilayeli bakapilukila kumwami Lehobowamu mbubonya mbuli mbwaakabaambilide. 13 Pele walo wakazoobaingula cabukali. Taakwe naakatobela malailile aakamupa bamanene pe. 14 Wakabaambila zyakamulailila bamusela wakwe zyakuti, “Kuti naa mukuli wataata wakamulemena, wangu uyoomuminya. Taata wakali kumuumya miluso pele mebo ndiyoomukwabbauzya zimboko!” 15 Kukaka ooku nkwaakacita kwakalibambidwe a Leza, mukuzuzikizya nzyaakaambide kuli Jelobowamu kwiindila muli Ahija musinsimi Musyilo.
16 Bantu nibakabona kuti mwami tabaswiilili bakapozomoka bati, “Tujisi lubazu nzi muli Devedi? Tujisi caabilo nzi mumwanaa Jese? Amubweede kumaanda aanu no Baisilayeli! Ayebo ociinga ca Devedi libonene!”
Mbombuboobu Baisilayeli mbubakazanga. 17 Pele kwaamba zya Baisilayeli bakali kukkala kuminzi yaku Juda, Lehobowamu wakabalela.
18 Mpawo mwami Lehobowamu wakatuma Adonilamu ooyo wakali kubelesya basicibbalo, pele Baisilayeli bakamuuma mabwe wafwa. Eeci nicakacitika, Lehobowamu wakafwambaana kunjila munkalaki yakwe akutijila ku Jelusalemu. 19 Mbombuboobu Baisilayeli mbubakazangila ciinga ca Devedi kusikila sunu.
20 Ciindi Baisilayeli nibakamvwa kuti Jelobowamu wakapiluka kuzwa ku Ijipiti, bakamutamba kuti aboole kumuswaangano ngobakacitide, eelyo bakazoomupa bwami bwa Isilayeli yoonse. Bamusyobo wa Juda buyo mbabakasyaala kabalelwa aciinga ca Devedi.
Businsimi bwa Syemaiya
21 Lehobowamu naakasika mu Jelusalemu, wakaita bantu bali zyuulu zili mwaanda amakumi aali lusele akusala baalumi kuzwa kumisyobo ya Juda a Benjamini kuti bainke akuyoolwana Baisilayeli, kuti baboozye bwami bwa Lehobowamu mwanaa Solomoni.
22 Pele Mwami Leza wakaambila Syemaiya musinsimi 23 kuti ainke kuyooambila Lehobowamu mwanaa Solomoni mwami wa Juda, abamisyobo yoonse ya Juda a Benjamini kuti, 24 “Mwami Leza waamba kuti, ‘Mutalwani banabokwanu Baisilayeli pe, amupilukile kumaanda aanu nyoonse, nkaambo ndime ndakacicita eeci.’” Nkaako bakaswiilila malailile aa Mwami Leza. Boonse bakapiluka kumaanda aabo mbubonya mbuli Mwami Leza mbwaakabalailila.
Jelobowamu mbwaakafutatila Leza
25 Lino Jelobowamu mwami wa Isilayeli wakakwabilila munzi wa Syekemu uuli munyika yatulundu-lundu ya Efulemu, wakkala nkuko. Kuzwa kooko wakainka waakuyakulula Penuweli. 26 Jelobowamu wakayeeya kuti, “Bwami inga bulaba nibupilukila kuciinga ca Devedi. 27 Kuti bantu aaba kabacuunka ku Jelusalemu kuyoopa zipaizyo kuŊanda ya Mwami Leza, balaba nobasandukila kuli Lehobowamu mwami wa Juda, bazoondijaya akulelwa a Lehobowamu alimwi.” 28 Lino naakaciyeeya eeci, wakabumba boombe bangolida bobilo, eelyo wakaambila bantu bakwe kuti, “Nobantu ba Isilayeli, caindilila kuya ku Jelusalemu kuyookomba, amubone mbaaba baleza banu aabo bakamuleta kuzwa mu Ijipiti!” 29 Umwi waboombe aabo wakamubikka ku Beteli umwi ku Dani. 30 Lino eeci cakaba cinyonyoono, bantu bakali kuunka mane ku Dani kuyookomba moombe wakali kooko. 31 Alimwi Jelobowamu wakayaka twaanda atala azilundu akucita masala-sala bapaizi nobatali Balevi.
32 Jelobowamu wakatalika pobwe lyakukomba mubuzuba bwakkumi aasanu mumwezi walusele mbubonya mbuli bwakali kucitwa ku Juda. Wakali kupa zipaizyo mu Beteli kupaizizya boombe bangolida aabo mbaakabumba. Alimwi wakanjizya abapaizi bamalende ku Beteli. 33 Mubuzuba bwakkumi aasanu mumwezi walusele, uuli ngomwezi ngwaakalisalila, wakali kuunka ku Beteli kuyoopaizya acipaililo ncaakaya.