1 Bami 11

Solomoni mbwaakaleka nzila ya Leza

¹ Solomoni wakali muntu uuyandisya bakaintu bazwamasi. Kunze amwanaa Falo wakakwata Bahiti, Bamowabu, Baamoni, Baedomu, a Basidoni. ² Wakakwata bakaintu aaba nikuba kuti Mwami Leza wakalaililide Baisilayeli kuti mutanookwatani ambabo, nkaambo ciyoomucita kuti mukombe baleza bambi. Nikuba boobo Solomoni wakacili kubayanda. ³ Nkabela Solomoni wakakwete bakaintu baciinga cabwami bali myaanda iili ciloba, abamwanakasuwa bali myaanda yotatwe. Aaba bakaintu mbabakacita kuti Solomoni asiye nzila ya Leza. ⁴ Lino Solomoni mbwaakali kuya bucembaala bakaintu aaba bakacita kuti akombe baleza bambi. Taakwe naakacili kusyomeka ku Mwami Leza wakwe mbuli bwakali Devedi wisi. ⁵ Wakakomba Asyitaloti leza mukaintu wa Basidoni a Moleki leza wa Baamoni uusesemya. ⁶ Solomoni wakabisizya Mwami Leza, alimwi taakali kutobela Mwami Leza mbuli bwakali kucita Devedi wisi. ⁷ Lino acilundu cili kujwe aamunzi wa Jelusalemu wakayaka busena bwakukombela Kemosyi leza uusesemya wa Bamowabu, alimwi wakayaka abusena bwakukombela Moleki leza uusesemya wa Baamoni. ⁸ Kwamana wakayakila bakaintu bakwe bamasi masena aakukombela, balo bakali kutenta tununkilizyo akupa zipaizyo zyakutenta kuli baleza babo.

⁹ Mwami Leza wakanyemena Solomoni akaambo kakuti wakasiya nzila ya Mwami Leza wa Isilayeli ooyo wakalibonya kulinguwe ziindi zyobilo. ¹⁰ Nikuba kuti Mwami Leza wakali mukasizye kutobela baleza bambi, walo taakaccilila kulailila kwakwe. ¹¹ Mwami Leza wakati kulinguwe, “Akaambo kakuti yebo omwini watyola cizuminano amalailile ngindakwaambila kuti waabambe alimwi ndakakwaambila, kuti otaabamba nzookunyanga bwami akubupa kuluumwi wababetesi bako. ¹² Nikuba boobo, akaambo ka Devedi uso eeci nsikoocicita yebo nocipona pe, ndiyoocicita ciindi kwaakulela mwanaako, ¹³ pele nsikooyoomunyanga bulelo boonse, ndiyoomusiila buyo musyobo omwe akaambo kamubelesi wangu Devedi alimwi akaambo ka Jelusalemu, munzi ooyo ngwindakalisalila.”

Basinkondonyina Solomoni

¹⁴ Lino Mwami Leza wakacita Hadadi, waciinga cabwami bwa Edomu kuti abukile Solomoni. ¹⁵ Kusaanguna Devedi naakali kulwana Baedomu, Jowabu silutwe wabasilumamba wakainka kuyoozikka Baisilayeli bakajaidwe, amane wakajaya baalumi boonse baku Edomu. ¹⁶ Jowabu abasilumamba bakwe bakakkala ooko kwamyezi iili cisambomwe. ¹⁷ Ciindi eeco Hadadi wakacili mulombe, wakatijila ku Ijipiti a Baedomu bamwi bakali balupati-pati mubwami bwawisi. ¹⁸ Bakazwida ku Midiyani, bagama ku Palani ooko nkobakaakutolelezya baalumi bamwi kuli Falo mwami wa Ijipiti. Falo wakapa Hadadi nyika yakukkala, ŋanda acakulya. ¹⁹ Falo wakayandisisya Hadadi cakuti wakamupa mulamwaakwe mukaintu Tapenesi kuti akwate. ²⁰ Mukaintu ooyo wakazyala mwana mulombe. Wakamuulika kuti Genubati. Mwana ooyu wakalelwa abanyina muŋanda yabwami ya Falo, ooko Genubati nkwaakali kukkala antoomwe abana ba Falo.

²¹ Pele Hadadi naakamvwa makani aakuti Devedi wakafwa, alimwi akuti Jowabu ooyo wakali mupati wabasilumamba, awalo wakafwa, Hadadi wakaambila mwami kuti, “Ndikumbila kuti ndibweede ono kucisi cokwesu.”

²² Lino mwami wakabuzya kuti, “Ino wabula nzi? Nkaambo nzi ncoyanda kubweeda kucisi cokwanu?” Hadadi wakati, “Peepe, taakwe. Ndizumizya ndibweede.” Eelyo wakabweeda kucisi cokwabo. ²³ Alimwi Leza wakacita kuti awalo Lezoni mwana wa Eliyada abukile Solomoni. Lezoni wakali muntu wakatija kuzwa kuli simalelo wakwe, mwami Hadadeza waku Zoba, ²⁴ akuyooba musololi wazigwebenga. Eeci cakacitika ciindi Devedi naakanyonyoona mpi yaku Zoba. Zigwebenga eezi zyakaya ku Damasikasi nkuzyakaakukkala. Zyakaakucita Lezoni kuti abe mwami wazyo ooko.

²⁵ Lezoni wakali sinkondonyina Solomoni mubuumi bwakwe boonse, mbubwakali kucita Hadadi. Lezoni wakalela mu Siliya kabatalangani kabotu a Baisilayeli.

Cisyomezyo ca Leza kuli Jelobowamu

²⁶ Awalo Jelobowamu mwanaa Nebati wakali umwi wabalupati-pati wakabukila Solomoni. Jelobowamu wakali Muefulemu uuzwa ku Zeleda. Banyina bakali bamukamufu Zeluwa. ²⁷ Mboobu mbwaakabukila mwami. Solomoni wakali kuyaka cikwabilizyo kulubazu lwakujwe lwa Jelusalemu alimwi akuyakulula bwaanda bwamunzi. ²⁸ Jelobowamu wakali mwaalumi singuzu, nkabela Solomoni naakabona kuti muntu wamulimo, wakamubikka kuba mulangi wabasicibbalo mucisi cabana ba Josefa. ²⁹ Lino buzuba bumwi Jelobowamu naakali kuzwida ku Jelusalemu wakaswaanywa amusinsimi Ahija kazwida ku Syilo, bakaswaangana bobilo. Ahija wakasamide jansi pya. ³⁰ Nkabela wakalisamununa, walidelaula muzibeela zili kkumi azibili, ³¹ mpoonya wakati kuli Jelobowamu, “Kotola zibeela eezi zili kkumi zibe zyako, nkaambo Mwami Leza wa Isilayeli waamba kuti, ‘Solomoni ndiyoomunyanga bwami, nkabela yebo ndiyookupa misyobo iili kkumi. ³² Solomoni ndiyoomusiila buyo musyobo omwe akaambo kamubelesi wangu Devedi alimwi akaambo ka Jelusalemu munzi ooyo ngwindakalisalila. ³³ Ndiyoocita oobo nkaambo kakuti Solomoni wakandikaka, wakatalika kukomba Asyitaloti leza mukaintu wa Basidoni, Kemosyi leza wa Bamowabu, alimwi a Moleki leza wa Baamoni. Solomoni tacinditobeli, nikuba kucita zeezyo nzindibotela. Tabambi milawo amalailile aangu mbuli bwakali kucita Devedi, wisi. ³⁴ Pele Solomoni nsikooyoomunyanga bwami muciindi coonse cabuumi bwakwe, akaambo kamubelesi wangu Devedi ooyo ngwendakasala, walo wakali kuswiilila akubamba milawo amalailile aangu. ³⁵ Ndiyoonyanga mwanaakwe bwami akuyookupa misyobo iili kkumi. ³⁶ Mwanaa Solomoni ndiyoomupa buyo musyobo omwe kutegwa lyoonse kandijisi umwi wabana bamubelesi wangu Devedi unoolela mu Jelusalemu, munzi ooyo ngwendakasala kuti bube busena bwakundikombela. ³⁷ Yebo lwako Jelobowamu, ndiyookucita kuti ukabe mwami wa Isilayeli, nkabela uyoolela cisi coonse mboyanda. ³⁸ Kuti naa ukandiswiilile amoyo omwe akutobela malailile amilawo yangu, mbubonya mbuli bwakali kucita mubelesi wangu Devedi, ndiyooba aanduwe lyoonse. Cibeela ca Isilayeli ndiyoocipa kulinduwe, alimwi balunyungu lwako mbabanoolela mbuli mbundakacita kuli Devedi. ³⁹ Pele akaambo kacibi ca Solomoni, njoobombya balunyungu lwa Devedi, pele kutali akutamani pe.’” ⁴⁰ Nkaako Solomoni wakasola kujaya Jelobowamu, pele Jelobowamu wakatijila kumwami Syisyaki waku Ijipiti, nkwaakaakukkala mane kusikila lufu lwa Solomoni.

Lufu lwa Solomoni

⁴¹ Lino zyoonse eezyo nzyaakacita Solomoni, zyamulimo azyabusongo bwakwe, zililembedwe mubbuku lyamilimo ya Solomoni. ⁴² Wakali mwami mu Jelusalemu kalela Baisilayeli boonse kwamyaka iili makumi one. ⁴³ Wakafwa akuzikkwa abasikale bakwe mumunzi wa Devedi, wisi, eelyo mwanaakwe Lehobowamu nguwakalela mubusena bwakwe.