1 Bakolinti 6

Zyamilandu akati ka Bakilisito

¹ Kuti naa umwi wanu kajisi kaambo amweenzinyina, mbuti mbwanga watola mulandu kubabetesi bakunze kuleka kubasyominyina? ² Sena tamuzi kuti basyomi bayoobeteka bantu baansi? Lino kuti bantu bakabetekwe andinywe, sena tamukonzyi kubeteka tukani tuniini akati kanu? ³ Sena tamuzi kuti tuyoobeteka bangelo? Ino tulakacilwa buti zyaansi aano? ⁴ Kuti kamujisi milandu azintu zili boobo, nkaambo nzi ncomwiitola kubabetesi batazi zyambungano? ⁵ Ndaamba boobo kuti muusye nsoni. Sena caamba kuti taakwe muntu musongo naba omwe akati kanu uukonzya kubeteka makani akati kabasyominyina? ⁶ Mbuti musyomi mbwabetesya munyina akutola mulandu kubabetesi batasyomi?

⁷ Nciconya cakuti muli aamilandu akati kanu nobeni catondezya kale kuti mwakacilwa. Sena tacili cibotu kubisisilwa buyo? Nkaambo nzi ncomutabelekeli buyo kuti batole zintu zyanu? ⁸ Pele lwanu nobeni mulabisya akutola zintu zyabamwi. Eezi mucita kubasyominyoko.

⁹ Sena tamuzi kuti bataluleme tabakooyootambula bwami bwa Leza? Mutalyeeni, kutali baabo buyo nibaba basibwaamu, bakomba mizimo, basimamambe, baalumi bacita zitaambiki abaaluminyina, ¹⁰ babbi, basindya, bakolwi, basimatusi, nibaba bafumpi tabakanjili mubwami bwa Leza pe. ¹¹ Oobo mbubakabede bamwi akati kanu. Pele nywebo mwakasanzigwa, mwakasalazigwa, alimwi mwakalulamikwa muzina lya Mwami Jesu Kilisito amu Muuya wa Leza wesu.

Mibili yanu mwiibelesye kuti iletele Leza bulemu

¹² “Zintu zyoonse zilizumizidwe kulindime,” pele takuli kuti zintu zyoonse zilagwasya. “Zintu zyoonse zilizumizidwe kulindime,” pele nsikabi muzike wacintu nociba comwe pe. ¹³ “Cilyo ncada, alyalo da ndyacilyo,” nikuba boobo Leza uyoonyonyoona zyoonse zyobilo. Mubili tuuli wabwaamu, ngwa Mwami, awalo Mwami ngomwini mubili ooyo. ¹⁴ Eelyo Leza wakabusya Mwami uyootubusya aswebo munguzu zyakwe.

¹⁵ Sena tamuzi kuti mibili yanu nzizo zya Kilisito? Sena nditole zizo zya Kilisito, ndizicite zizo zyamwaamu? Peepe! ¹⁶ Sena tamuzi kuti ooyo uulipa kumwaamu waba mubili omwe anguwe? Nkaambo mbubonya mbuli mbokulembedwe kuti, “Aabo bobilo balaba mubili omwe.” ¹⁷ Pele ooyo uulipa ku Mwami ulaba omwe mumuuya anguwe.

¹⁸ Amuleke bwaamu. Cibi cimwi acimwi ncacita muntu tacibisyi mubili, pele sibwaamu ulabisizya mubili wakwe mwini. ¹⁹ Sena tamuzi kuti mibili yanu niŋanda ya Muuya Uusalala uuli mulindinywe, ngomutambwide kuli Leza? Ncencico eeco buumi mbomujisi tabuli bwanu nobeni pe. ²⁰ Mwakaulwa amuulo uudula. Aboobo amulemye Leza mumibili yanu.