1 Bakolinti 5

Makani aabwaamu mumbungano

¹ Lino makani alimvwidwe kuti kuli bwaamu akati kanu.

Bwaamu oobo mbuboobo butacitwi abakunze pe. Ndakamvwa kuti muntu umwi unjila muŋanda yawisi. ² Pele mucilisumpula! Tee mweelede kuba aansoni akumugwisya akati kanu ooyo uucita zyamafunze zili boobo! ³ Kwaamba zyandime nikuba kuti nsili aandinywe, pele moyo wangu uli aandinywe. Eelyo muzina lya Mwami Jesu ndamubeteka wakacita boobo. ⁴ Mwaakubungana mbuli kuti mpendi andinywe alimwi munguzu zya Mwami Jesu, ⁵ mukaabe muntu ooyo kuli Saatani kuti mubili wakwe unyonyoonwe, pele muuya wakwe ukafutulwe mubuzuba bwa Mwami Jesu.

⁶ Kulisumpula kwanu nkwabuyo. Sena tamuzi kuti, “Tumena tuniini tulafufumusya mulwi woonse?” ⁷ Amugwisye mimena yakaindi yazibi kuti mube mulwi mupya, ndizi kale kuti mbomubede. Nkaambo Kilisito, uuli mwanaa mbelele wa Pobwe lya Kwiindilila wakapaizigwa kale. ⁸ Aboobo atusekelele, kutali aamimena yakaindi yabubi akubija moyo, pele acinkwa citakwe mimena, cabubotu akusalala moyo.

⁹ Ndakamulembela mulugwalo lwangu kuti mutayanzani abasibwaamu. ¹⁰ Takuli kwaamba kuti mutamvwani abantu boonse munyika bali mbaasibwaamu, basindya abafumpi nibaba basikukomba mizimo. Nikwali boobo nimwalizwide kale munyika. ¹¹ Pele ndakamulembela kuti naa kuli muntu naba omwe waamba kuti musyomi, pele kali sibwaamu, sindya, sikukomba mizimo, simatusi, cakolwa, naa mubbi, muntu uuli boobo tamweelede nikuba kulya anguwe pe. ¹² Kubeteka bakunze mwati mulimo wangu? Sena nywebo tamweelede kubeteka basyominyoko babisya? ¹³ Leza nguubeteka bakunze aabo. “Amumugwisye ooyo muntu mubi akati kanu.”