1 Bakolinti 3

Zyababelesi ba Leza

¹ Lino mebo, nobakwesu, nsiindakakonzya kumwaambila mbuli kuti muli bantu bajisi Muuya, ndakamwaambila mbuli kuti muli bantunsi, mbuli bana muli Kilisito. ² Ndakamupa mukupa kutali cilyo ciyumu, nkaambo tiimwakanaelela. Aciindi cino tamunaelela, ³ nkaambo mucili bantunsi. Akati kanu kuli munyono akukazyanya. Tee eeci ncecitondezya kuti mucili bantunsi, alimwi muccilila akucita zyabuntunsi? ⁴ Umwi ulaamba kuti, “Ime ndiwa Paulu,” aumwi, “Ime ndiwa Apolosi,” sena tamuli mbuli bantunsi?

⁵ Ani Apolosi nguni? Ani Paulu awalo nguni? Tee tuli babelesi buyo aabo bamuleta kulusyomo. Umwi aumwi wesu ulabeleka mulimo ngwaakapegwa a Mwami. ⁶ Mebo ndakali mbuli uusyanga mbuto Apolosi watilila, pele uupa kuti zimene ngu Leza. ⁷ Mwabona kuti uusyanga naba uutilila kunyina mbwabede, ccita buyo Leza uuzimenya. ⁸ Ooyo uusyanga ayooyo uutilila, boonse beelene buyo, alimwi umwi aumwi uyootambula bulumbu bweelede mulimo wakwe. ⁹ Nikuba boobo tuli basimilimonyina a Leza, nywebo muli muunda wa Leza.

Muli ŋanda ya Leza. ¹⁰ Nkaambo Leza muluse lwakwe wakandituma kuti nkabambe ntalisyo mbuli muyaki musongo, pele uumbi nguuyaka alinjiyo. Eelyo lino umwi aumwi acenjele mbuli mbwayaka. ¹¹ Nkaambo taakwe ntalisyo iimbi muntu njakonzya kubamba kwiinda eeyi iibambidwe, nkokuti Jesu Kilisito. ¹² Antalisyo eeyi muntu ulakonzya kuyaka angolida, nsiliva, naa mabwe meebesi, nikuba amasamu, bwizu naaba matete. ¹³ Mulimo wamuntu umwi aumwi uyoobonwa, nkaambo buzuba bwalubeta buyooutondezya. Buzuba oobo buyoosika amulilo, eelyo mulilo uyoosola milimo yamuntu umwi aumwi mbwiibede. ¹⁴ Eezyo muntu nzyaakayaka antalisyo eeyi kuti zikakkalilile, muyaki ooyo uyootambula bulumbu. ¹⁵ Pele kuti zikasyukute, takatambuli bulumbu pe, nikuba boobo uyoofutulwa, pele mbuli muntu wakwelwa kuzwa kumulilo.

Muntu niŋanda ya Leza

¹⁶ Sena tamuzi kuti nywebo muli ŋanda ya Leza, akuti Muuya wa Leza uli mulindinywe? ¹⁷ Kufumbwa ooyo uunyonyoona ŋanda ya Leza, awalo Leza ulamunyonyoona. Nkaambo ŋanda ya Leza ilasalala, nkabela nywebo ndendinywe ŋanda eeyo.

¹⁸ Mutalyeeni pe. Kuti naa umwi akati kanu kaliyeeya kuti musongo kwaamba zyabuntunsi, ooyo uleelede kulicita mbuli mufuba-fuba, ndendilyo natibe aabusongo bwini-bwini. ¹⁹ Kayi busongo bwabuntunsi mbufuba-fuba buyo kuli Leza. Mbuli mbokulembedwe kuti, “Leza ulajata basongo mubucenjezu bwabo.” ²⁰ Aamwi Malembe alati, “Mwami ulizi kuti miyeeyo yabasongo njabuyo.” ²¹ Aboobo kutabi muntu uulikankaizizya buntunsi. Nkaambo zintu zyoonse nzizyanu, ²² Paulu, Apolosi, Kefasi, nyika, buumi, lufu, eezyo ziliko aziciboola. Pele nikuba kuti zyoonse nzizyanu, ²³ nywebo muli bakwe Kilisito, awalo Kilisito nguwa Leza.