1 Bakolinti 2

Makani aa Kilisito wakakankaminwa

¹ Nindakasika kulindinywe, nobakwesu, kuzoomwaambila makani aa Leza aasisidwe alo aali ngabwini, nsiindakasola kulitondezya mbuli musongo amajwi acenjede. ² Nkaambo ndakayeeya kuti intazibyi cimwi cintu akati kanu ccita buyo Jesu Kilisito ooyo wakakankaminwa. ³ Ndakaboola kulindinywe mubuteteete akuyoowa. Alimwi ndakali kuzyangama kapati. ⁴ Nindakali kukanana naa kukambauka, nsiindakabelesya majwi masongo mukusola kukwela bantu, pele ndali kubonya zitondezya nguzu zya Muuya Uusalala. ⁵ Ndakali kucita oobo kuti mutasyomi nkaambo kabusongo bwabantu pele nkaambo kanguzu zya Leza.

Busongo buzwa ku Muuya Uusalala

⁶ Tulakanana majwi aabusongo kulibaabo basimide mulusyomo. Busongo oobu tabuli bwabuntunsi nibuba bwabaleli banyika balaanguzu zimana buyo. ⁷ Busongo mbotwaamba, mbusongo bwa Leza busisidwe. Leza katanalenga nyika, wakabambila limwi zyabusongo eezi kuti atupe bulemu. ⁸ Taakwe naba omwe wabaleli basunu wakabumvwisya pe, nkaambo nibakabumvwisisya nibatakakankamina Mwami wabulemu. ⁹ Pele mbuli Malembe mbwaati,

“Eezyo muntu nzyaatakabona naa kumvwa,

eezyo muntu nzyaatakayeeya,

nzenzizyo Leza nzyabambilide aabo bamuyanda.”

¹⁰ Swebo, Leza, wakatuyubunwida eezi kwiindila mu Muuya Uusalala. Nkaambo Muuya nguuzi zintu zyoonse, naaba makani aamaseseke aa Leza. ¹¹ Sena kuli muntu uuzi miyeeyo yamuntu umwi kunze aamuuya wakwe mwini? Mbubonya oobo taakwe muntu uukonzya kuziba miyeeyo ya Leza kunze aa Muuya wa Leza mwini. ¹² Swebo tiitwakatambula muuya wabuntunsi, pele twakatambula Muuya uuzwa kuli Leza, kuti atuzibye eezyo Leza nzyatupa cabuyo.

¹³ Tulakambauka eezi kutali amajwi aaiisigwa abusongo bwabantunsi, pele amajwi aatwiisya Muuya Uusalala. Tulaiisya zyamuuya amajwi aazwa ku Muuya. ¹⁴ Muntu uutajisi Muuya ulakaka zizwa ku Muuya Uusalala. Uziyeeya kuti nzyabufuba-fuba, alimwi takonzyi kuziziba, nkaambo kunyina muntu uukonzya kuziziba katajisi Muuya. ¹⁵ Kuti naa muntu kajisi Muuya ulakonzya kuziba bubi bwazintu zyoonse kwamana kunyina uukonzya kumukazya pe. ¹⁶ Cili mbuli bwaamba Malembe kuti,

“Ani nguni uuzi mizeezo ya Mwami Leza

kuti amulailile walo?”

Lino swebo tulijisi mizeezo ya Kilisito.