1 Bakolinti 15
Zyabubuke bwa Kilisito
1 Lino bakwesu, njanda kumuyeezya Makani Mabotu ngindakamukambaukila. Mwakaatambula alimwi nentalisyo yalusyomo lwanu. 2 Mulafutulwa angawo kuti mwaajatisya, ccita kamuli mwakasyoma cabuyo.
3 Nkaambo kusaanguna ndakamupa eeco ncindakatambula, cakuti Kilisito wakafwa akaambo kazinyonyoono zyesu, mbubonya mbuli Malembe mbwaaamba. 4 Wakazikkwa, eelyo wakabusigwa mubuzuba bwatatu mbubonya mbuli Malembe mbwaaamba. 5 Lino wakalibonya kuli Kefasi, akuli bali kkumi ababili. 6 Mpoonya wakalibonya kubantu bakali kwiinda kumyaanda yosanwe ciindi comwe, bunji bwabo bacipona asunu, nikuba kuti bamwi bakafwa. 7 Alimwi wakalibonya kuli Jemusi, amane kubatumwa boonse. 8 Kumamanino wakalibonya kulindime eendi mbuli mwana wakabelulwa.
9 Nkaambo mebo ndendime mutumwa muniini kuli boonse, nseelede kwiitwa kuti mutumwa pe, nkaambo ndakali kupenzya mbungano ya Leza. 10 Pele muluse lwa Leza ndakaba mbweli sunu, alimwi luse lwakwe kulindime tiilwakali lwabuyo pe. Nkaambo ndakabeleka milimo kwiinda boonse, nikuba boobo teensi ndime, pele nduse lwa Leza luli aandime. 11 Nikuba kuti uukambauka abe ndime naa balo, taakwe makani. Toonse tukambauka Makani Mabotu aayo nywebo ngumwakasyoma.
Zyabubuke bwabafu
12 Lino kuti naa ncotukambauka ncakuti Kilisito wakabusigwa kubafu, mbubuti bamwi banu mbobati, “Bafu tabakabuki alimwi?” 13 Kuti naa bafu tababuki, nkokuti awalo Kilisito taakwe naakabusigwa pe. 14 Kuti naa Kilisito taakabuka, nkokuti kukambauka kwesu nkwabuyo, anywebo mwasyoma cabuyo. 15 Naa kacili boobo nkokuti tupa bumboni bwakubeja, notwaamba kuti Leza wakabusya Kilisito kuzwa kubafu. Naa kaali masimpe kuti bafu tabakabuki, nkokuti Leza taakabusya Kilisito. 16 Kuti naa ncobeni bafu tababusigwi, nkokuti awalo Kilisito taakabuka pe. 17 Kuti naa Kilisito taakabuka, nkokuti mwasyoma cabuyo. Nkaako mucili muzinyonyoono zyanu. 18 Eelyo aabo bakafwa kabasyoma Kilisito bakafwidilila. 19 Naa lusyomo lwesu muli Kilisito kaluli buyo lwabuumi buno, tuleelede kufwidwa nsoni kwiinda bantu boonse.
20 Pele masimpe ngakuti Kilisito wakabusigwa kuzwa kubafu. Nkokwaamba kuti ngolusinizyo lwakuti boonse bakafwa bayoobusigwa. 21 Mbubonya mbuli lufu mbulwakaza amuntu, abwalo bubuke bwabafu bwakaza amuntu. 22 Nkaambo mbubonya mbuli bantu boonse mbobafwa mukuti mbana ba Adamu, mbubonya oobo boonse mbobayoobusigwa muli Kilisito. 23 Pele umwi aumwi muciindi cakwe ceelede, Kilisito nguwakasaanguna, eelyo ciindi cakuboola kwakwe mbaabo bamusyoma. 24 Mpoonya mamanino ayooba, nkabela uyoopa bwami kuli Leza Wisi aakumana kunyonyoona bweendelezi boonse abulelo boonse, anguzu zyoonse. 25 Kayi Kilisito uleelede kweendelezya mane Leza akabikke basinkondonyina boonse munguzu zyakwe. 26 Sinkondonyina musyaalizi uyoonyonyoonwa ndufu. 27 Nkaambo Malembe aamba kuti, “Leza wabikka zintu zyoonse munguzu zyakwe.” Pele kwaambwa kuti, “Zintu zyoonse zili munguzu zyakwe,” cilamvwigwa kabotu kuti teensi Leza lwakwe uubikkilizigwa muzintu zyoonse. 28 Lino zintu zyoonse zyaakubikkwa munguzu zyayooyo wakabikka zintu zyoonse munguzu zyakwe, kuti Leza abe nguuendelezya zyoonse.
29 Ino, bantu baamba nzi ciindi nibabbapatizigwa akaambo kabafu? Kuti naa bafu tababusigwi, nkaambo nzi nibabbapatizigwa akaambo kabo? 30 Ino mebo lwangu nkaambo nzi ncendipenga ciindi coonse? 31 Akaka nobakwesu, mebo lwangu ndafwa mazuba oonse! Ndaambisya nkaambo ndalisumpula andinywe muli Jesu Kilisito Mwami wesu. 32 Nindakajana mpindu nzi kuti nkelwana abutambo ku Efesusi? Naa bafu tababusigwi, ani atucite mbuli mbobaamba kuti, “Atulye akunywa, kayi juunza tulafwa.”
33 Mutacengwi pe, “Mweenda abamineme, anywebo mulaminama.” 34 Amuzikame cakululama, mutabisyi limbi. Bamwi banu tabamuzi kabotu Leza. Ndaamba boobu kuti muusye nsoni.
Mubili uyoobusigwa kubafu
35 Pele umwi muntu inga wabuzya kuti, “Ino bafu babusigwa buti? Bayooba aamibili iili buti?” 36 Yebo, kufubaala! Ncosyanga tacimeni akupona ccita casaanguna kufwa. 37 Alimwi eeco ncosyanga taciboneki mbuli mbociyoomena pe, usyanga nseke yamaila niiba nseke iimbi buyo. 38 Pele Leza uliibamba mbuli mboibede. Nguucitya nseke imwi aimwi kuba boobo.
39 Lino takuli kuti mibili yoonse ilakozyanya. Kuli nyama yabantu, kuli nyama yabanyama, alimwi kuli nyama yabayuni anyama yanswi. 40 Kuli zilenge zyakujulu azyaansi. Bulemu bwazyakujulu mbumbi, abwalo bulemu bwazyaansi mbumbi. 41 Kuli bulemu bwazuba, bulemu bwamwezi, bulemu bwanyenyezi alimwi nyenyezi imwi aimwi ilaandeene kuzwa kubulemu bwaimwi. 42 Abwalo bubuke bwabafu mbobubede mbubonya oobo. Notuzikka cili mbuli kuti tulasyanga. Cazikkwa cilabola, pele caakubusigwa tacikaboli limbi pe. 43 Cizikkwa taceebeki alimwi cinyina nguzu, pele ciyoobusigwa nceebesi alimwi cilijisi nguzu. 44 Cilazikkwa amubili wabuntunsi, cilabuka amubili wamuuya. Kuti naa mpuuli mubili wabuntunsi, nkokuti mpuuli amubili wamuuya. 45 Mbubonya mbuli mbokulembedwe kuti, “Adamu mutaanzi wakaba muumi,” pele Adamu musyaalizi wakaba muuya uupa buumi. 46 Takuli kuti mubili uusaanguna ngwamuuya pe, ngwabuntunsi, eelyo wamusule ngwamuuya. 47 Muntu mutaanzi wakazwa ansi, ngwabulongo, muntu wabili wakazwa kujulu. 48 Mbubuli bwakali muntu wabulongo, abalo bantunsi mbobabede. Alimwi mbubuli bubede muntu uuzwa kujulu, abalo bantu bakujulu mbobabede. 49 Mbubonya mbuli mbotujisi cinkonzya camuntu wabulongo tuyooba acinkonzya camuntu wakujulu. 50 Ndamwaambila eeci, nobakwesu, muntunsi takonzyi kunjila mubwami bwa Leza, niciba cifwa tacikonzyi kunjila kuli zitafwi.
51 Amubone! Ndamwaambila makani aasisidwe. Tatukooyoofwa toonse pe, pele toonse tuyoosandulwa, 52 mukaindi kaniini buyo mukulaba kwaliso, waakulila mweembo. Nkaambo mweembo uyoolila, nkabela bafu bayoobuka amibili iitafwi, eelyo aswebo tuyoosanduka. 53 Nkaambo mubili ooyu uubola uleelede kusanduka kuba uutaboli, mubili ooyu uufwa uleelede kusanduka kuba uutafwi. 54 Lino mubili uubola waakusanduka uutaboli, uufwa wakusandula uutafwi, ndendilyo noziyooba zyakalembwa mu Malembe kuti, “Lufu lwazundwa.”
55 “Yebo lufu, luli kuli luzundo lwako?
Yebo lufu, luli kuli lubole lwako?”
56 Lubole lwalufu ncinyonyoono, cipa nguzu kucinyonyoono Mulawo. 57 Pele aalumbwe Leza watupa luzundo kwiindila mu Mwami wesu Jesu Kilisito.
58 Nkaako, nobakwesu bayandika, amuyume mutazungaani pe, amubikke myoyo yanu lyoonse kumilimo ya Mwami nkaambo mulizi kuti milimo yanu yamu Mwami tiili yabuyo pe.