1 Bakolinti 14
Azimwi zipego zizwa ku Muuya Uusalala
1 Amukakatile kuba aaluyando, alimwi mubikke moyo oonse azipego zipa Muuya Uusalala, kwaambisya cipego cakwaamba makani aa Leza. 2 Nkaambo waamba musyobo uutazizilwe taambauli kubantu pe, ulaambaula kuli Leza, nkaambo taakwe muntu naba omwe uumumvwa. Muuya Uusalala nguumwaambya makani aa Leza aasisidwe. 3 Pele ooyo waamba mulumbe wa Leza ulaambila bantu majwi aayaka, aayumya, aaumbulizya. 4 Ooyo uukanana musyobo uutazizilwe ulaliiisya lwakwe mwini, pele ooyo waamba mulumbe wa Leza ulayaka basimbunganonyina boonse. 5 Lino ndayanda kuti nyoonse mwaambe mumisyobo, pele cintu ncinjanda kwiinda ncakuti mwaambe makani aa Leza cakumvwika. Ooyo waamba mulumbe wa Leza mmupati kwiinda yooyo uukanana mumisyobo iimbi, kuti kakunyina umwi uupandulula kuti bambungano bayakwe.
6 Lino nobakwesu, ciyoomugwasya nzi kuti nkeamba misyobo njomutazi? Kunyina ncomuyoojana akwaamba kwangu ooko, ccita ndamuletela Leza nzyaandiyubunwida, mbuli luzibo, mulumbe wa Leza, ambweni alwiiyo lumwi. 7 Twaambe azintu zyabuyo zilaamwajwi, mbuli nyeele nikaba kalumbu. Kuti bazilizya tabeendelanyi majwi aanzizyo, uuswiilila takonzyi kuziba lwiimbo lwiimbwa. 8 Alimwi kuti naa mweembo kautalili kabotu, ino nguni uunga ulalibambila nkondo? 9 Mbokubede kulindinywe anywebo, kuti naa kamwaamba majwi aatamvwigwi, ino kulazibwa buti kuti makani nzi aaambwa? Nkaambo munooambawida buyo luuwo. 10 Ncobeni nkwiili misyobo minji yaandeene-andeene muno munyika, pele taakwe musyobo uunyina ncuuamba pe. 11 Kuti naa nketamvwi musyobo waambwa, ndaba mweenzu kuli ooyo waamba, awalo ulaba mweenzu kulindime. 12 Mukuti mulayandisisya amoyo woonse zipego zipa Muuya, amusoleke kuzibelesya, kwaambisya zipego ziyumya mbungano. 13 Ooyo uukanana mumusyobo uumbi uleelede kukomba kuti apegwe cipego cakuupandulula. 14 Kuti naa ndakomba mumusyobo uumbi, muuya wangu ulakomba, pele muzeezo wangu tuukwe mpindu. 15 Aboobo njelede kucita buti? Ndileelede kukomba amuuya wangu alimwi amizeezo. 16 Wakomba Leza amuuya wako walo, ino muntu ulaanduwe uutazi, uutamvwi zyamuuya ooyo, inga wazumina buti kuti, “Akube boobo” kumajwi ngolumbya? Kayi tazi ncoamba! 17 Nikuba kuti ulumbe Leza kabotu-kabotu, pele muntu umwi tayakwi amajwi aayo pe.
18 Ndalumba Leza kuti ndizi misyobo iimbi kwiinda ndinywe nyoonse, 19 pele mumbungano cilandibotela kwaamba majwi naaba osanwe buyo aamvwigwa kabotu, kuti nkaiisye bamwi, kwiinda kwaambaula majwi aali zyuulu zili kkumi mumusyobo uumbi.
20 Nobakwesu, mutabi mbuli bana mukuyeeya kwanu pe. Amube mbuli bavwanda caza kukubisya, pele amusime mukuyeeya kwanu. 21 Mumalembe kulilembedwe kuti,
“Bantu aaba nzoobaambila abantu baamba misyobo iimbi,
nzoobaambila amilomo yabamasi,
nikuba boobo tabakoozoondiswiilila pe,” mbwaamba Mwami Leza.
22 Mboobu, misyobo ncitondezyo citali cabasyomi, ncabaabo batasyomi, pele kwaamba Mulumbe wa Leza tuuli mulimo wabaabo batasyomi, ngwabaabo basyoma.
23 Kuti naa mbungano yabungana antoomwe yoonse, nkabela boonse baamba misyobo iimbi, kwamana kwanjila bamwi beenzu naa batasyomi, sena tabakooamba kuti mwasondoka? 24 Pele kuti naa boonse baamba Mulumbe wa Leza, mpoonya kwanjila umwi uutasyomi naa mweenzu, muntu ooyo ulazulwa nkaambo majwi aabo boonse alikumunjila. 25 Makani aasisidwe mumoyo wakwe alayubunuka, eelyo ulakotama akukomba Leza, alimwi ulaamba kuti ncobeni Leza mpali akati kanu.
Nzila yakukomba
26 Ino tutyani, nobakwesu? Ciindi ncimubungana antoomwe, umwi ulijisi lwiimbo, umwi ciiyo cakwiisya, umwi cintu Leza ncaamuyubunwida, umwi uyanda kukanana musyobo uumbi naa kuupandulula. Zyoonse eezi zicitwe mukuyanda kuyaka mbungano. 27 Kuti naa kuli bayanda kukanana mumisyobo iimbi babe bobilo naa botatwe buyo, bataindilili aawo pe. Baambe cakupana ziindi. Kwamana umwi apandulule majwi aayo. 28 Pele kuti kakutakwe sikupandulula baumune buyo mumbungano, eelyo umwi aumwi aambile Leza mumoyo cuumunizi.
29 Kwaamba zyabaabo baamba Mulumbe wa Leza, abalo mbubonya babe bobilo naa botatwe buyo mukwaamba, bayeeyele mulumbe waambwa. 30 Pele kuti naa umwi uukkede wayubunwidwa mulumbe uuzwa kuli Leza, ooyo waamba aumune. 31 Nkaambo nyoonse mulakonzya kwaamba mulumbe wa Leza, kufumbwa buyo kuti mwapana ciindi kutegwa boonse baiye alimwi boonse bayumizigwe. 32 Aabo bali aacipego cakwaamba mulumbe uuzwa kuli Leza bazibe kubelesya cipego eeco. 33 Nkaambo Leza tali Leza walupyopyongano, ngwaluumuno.
Mbubonya mbuli mumbungano zyoonse zyabasyomi, 34 bakaintu baleelede kuumuna. Nkaambo balo tabazumizigwi kukanana, pele baleelede kulibombya buyo, mbubonya mbuli Mulawo wa Bajuda mbuuamba. 35 Naa kuti kakuli cintu ncebayanda kuziba, babuzye baalumi babo kumaanda. Nkaambo cuusya nsoni kubakaintu kukanana mumbungano.
36 Sena majwi aa Leza akazwida kulindinywe, naa akasikila kulindinywe? 37 Kuti naa umwi kaliyeeya kuti musinsimi, naa kuti ujisi cipego ca Muuya Uusalala, uleelede kuziba kuti zintu eezi nzemulembela mulawo uuzwa ku Mwami. 38 Pele kuti naa kuli muntu uuzikaka, awalo uyookakwa a Leza.
39 Aboobo nobakwesu, amubikke myoyo yanu kukwaamba mulumbe wa Leza, pele kwaamba misyobo iimbi mutakukasyi pe. 40 Zyoonse zintu zileelede kucitwa kabotu alimwi mumulawo.