1 Bakolinti 11
1 Amwiiye ndime mbubonya mbuli mbwendiiya Kilisito.
Zyabakaintu nobakomba
2 Ndamulumbaizya nkaambo mulandiyeeya muzintu zyoonse, akujatisya njiisyo zyoonse mbuli mbundakamwiisya. 3 Pele ndiyandisya kuti mumvwisye kapati kuti mutwe wamwaalumi umwi aumwi ngu Kilisito, alimwi mutwe wamukaintu mwaalumi, awalo mutwe wa Kilisito ngu Leza. 4 Kufumbwa mwaalumi uukomba nikuba kusinsima kalivumbide kumutwe uubausya mutwe wakwe. 5 Pele kufumbwa mukaintu uukomba nikuba kukambauka katalivumbide kumutwe uubausya mutwe wakwe, ncimwi buyo akuti mutwe wakwe kuukulwidwe. 6 Kuti naa mukaintu talivumbi kumutwe, uleelede kukululwa. Pele kuti kacifwisya nsoni kumukaintu kuti apalulwe naa kukululwa, mbubo alivumbe. 7 Mwaalumi teelede kuvumba mutwe wakwe pe, mbokunga walo ncikozyanyo alimwi mbulemu bwa Leza, pele mukaintu mbulemu bwamwaalumi. 8 Nkaambo mwaalumi taakwe naakalengwa kuzwa kumukaintu, pele mukaintu wakazwa kumwaalumi. 9 Alimwi mwaalumi taakwe naakalengelwa mukaintu, pele mukaintu wakalengelwa mwaalumi. 10 Lino nkaambo kabangelo mukaintu nceelede kulivumba kumutwe. 11 Nikuba boobo mubuumi bwesu bwa Bukilisito, mukaintu tabalwi alikke ccita antoomwe amwaalumi, awalo mwaalumi tabalwi alikke ccita antoomwe amukaintu. 12 Nkaambo mbubonya mbuli mukaintu mbwaakazwa kumwaalumi, awalo mwaalumi ulazyalwa kumukaintu. Pele zilenge zyoonse zilazwa kuli Leza.
13 Lino amuliyeeyele makani aaya nobeni, sena kuleelede kuti mukaintu akombe kuli Leza katalivumbide kumutwe? 14 Sena moyo tutwiisyi kuti ncansoni kuti mwaalumi kajisi masusu malamfu, masampu aakwe, 15 akuti kumukaintu mbulemu kuba amasusu malamfu? Nkaambo masusu aakwe akapegwa kulinguwe a Leza kuti cibe civumbyo camutwe wakwe. 16 Kuti naa kuli muntu uuyanda kukazya makani aaya, ndaamba kuti tatujisi ciyanza cimbi swebo niziba mbungano zya Leza pe.
Zyamulalilo wa Mwami
17 Pele kuli amwi mpetakonzyi kumulumbaizya. Mpakuti kubungana kwanu takuli kubotu, nkubi. 18 Nkaambo cakusaanguna ndamvwa kuti ciindi nomubungana mulasalulana, ambebo ndaazumina-zumina aaya. 19 Ncobeni kuleelede kuti kube kwaandaana akati kanu kuti basyomeka balibonye. 20 Lino nomubungana antoomwe, tuuli mulalilo wa Mwami ngomulya pe. 21 Nkaambo mukulya kwanu umwi aumwi ulalya cilyo cakwe mwini, kwamana umwi ufwa nzala, umwi ulakolwa. 22 Ino ncite buti? Sena tamujisi maanda aakulida akunywida? Naa muyanda kusampula mbungano ya Leza akuusya nsoni bacete? Ino ndimwaambile buti? Sena ndeelede kumulumbaizya kumakani aaya? Embo pe, nsikoomulumbaizya.
23 Nkaambo mebo ndakatambula kuzwa ku Mwami makani aayo ngindakamusiila, aakuti Mwami Jesu masiku aayo ngoonya ngaakaabwa, wakabweza cinkwa, 24 nkabela naakamana kulumba Leza, wakacikomona wati, “Ooyu ngomubili wangu ngomwakomwedwa. Amucite oobu kuti cibe ciibalusyo candime.” 25 Munzila njiyonya wakabweza nkomeki, bamane kulya, wati, “Eeyi nkomeki ncizuminano cipya cabulowa bwangu. Kamucita oobo, kufumbwa ciindi ncomunywa, kuti cibe ciibalusya candime.” 26 Nkaambo kufumbwa ciindi ncomulya cinkwa eeci munootondezya lufu lwa Mwami mane do akasike.
27 Nkaambo kaako kufumbwa uulya cinkwa akunywida munkomeki kateelede, uyoobaa mulandu wakusampaula mubili abulowa bwa Mwami. 28 Muntu umwi aumwi uleelede kulilingula lwakwe mwini, eelyo natilye cinkwa akunywida munkomeki. 29 Kufumbwa ooyo uulya akunywa katatelaiki mubili wa Mwami, ulalya akunywa cakuliletela cisubulo. 30 Nkankakaako bunji bwanu ncobaciswa akugonkelwa, alimwi bamwi balafwa. 31 Pele kuti nitwali kulilingula lwesu tobeni kabotu-kabotu, nitwatali kusubulwa pe. 32 Pele ciindi natusubula Mwami ulatulaya kuti swebo tutakasinganyizigwi antoomwe abatazi Leza.
33 Aboobo, nobakwesu, kufumbwa ciindi ncimubungana antoomwe kukulya, amulindilane, 34 kuti naa umwi kafwa nzala alye kuŋanda yakwe, kuti ambweni Leza inga ulamusubula akaambo kakubungana kwanu kubi. Makani amwi nzoomulailila ndasika.